2026 оны наймдугаар сарын байдлаар улсын хэмжээнд газар тариалангийн болон мал аж ахуйн бэлтгэл ажлын эхний дүнгүүд гарлаа. Хүнсний ногооны хураалт өссөн эерэг мэдээтэй байгаа бол мал аж ахуйн чухал суурь болох хадлан, гар тэжээлийн бэлтгэл өмнөх оны мөн үеэс буурсан үзүүлэлттэй байна. Тодруулбал, улсын хэмжээнд наймдугаар сарын байдлаар 19.0 мянган тонн төмс хураан авсан нь өмнөх оны мөн үеэс 9.5 мянган тонноор буюу хоёр дахин нэмэгдсэн байна. Мөн 25.3 мянган тонн хүнсний ногоо хураан авсан нь өнгөрсөн оны үзүүлэлтээс 3.6 мянган тонноор буюу 16.3 хувиар өссөн гүйцэтгэлтэй гарчээ.
Харин өвөлжилтийн бэлтгэл ажлын хувьд наймдугаар сарын байдлаар улсын хэмжээнд 153.5 мянган тонн хадлан бэлтгэсэн нь өмнөх оны мөн үетэй харьцуулахад 3.1 мянган тонноор буюу 2.0 хувиар буурсан дүнтэй байна.
Түүнчлэн 1.9 мянган тонн гар тэжээл бэлтгэсэн нь өнгөрсөн оноос 3.1 мянган тонноор буюу 61.6 хувиар буурсан байгаа нь малчдын хувьд өвөлжилтийн дарамтыг нэмэгдүүлж болзошгүй юм.
Ургац хураалтын явцыг бүс нутгаар авч үзвэл Дундговь, Дорнод, Баянхонгор, Говь-Алтай, Хөвсгөл, Архангай, Хэнтий, Ховд аймаг болон Улаанбаатар хотод хураан авсан төмсний хэмжээ өмнөх онтой харьцуулахад 1.9-89.1 хувиар буурсан байна. Хүнсний ногооны хувьд Дорноговь, Дундговь, Баян-Өлгий, Говь-Алтай, Өмнөговь, Баянхонгор, Архангай, Хэнтий, Ховд, Дархан-Уул аймаг болон Улаанбаатар хотод хураан авсан хэмжээ 2.7-89.2 хувиар буурсан үзүүлэлттэй гарчээ. Харин бусад аймгуудад хүнсний ногооны хураалт өмнөх оны мөн үеэс 2.0 хувиас 6.7 дахин хүртэл нэмэгдсэн өндөр өсөлттэй байна. Энэ жилийн ургац хураалтын эхний дүнгээр төмс, хүнсний ногооны гарц өссөн нь богино хугацаанд хүнсний үнийн дарамтыг сулруулах боломжтой ч хадлан, гар тэжээлийн бэлтгэл буурсан нь мал аж ахуйн салбарт анхаарах дохио болж байна.