Эдийн засгийн нийт өсөлтийн 3.4 хувийг уул уурхай дангаараа бүрдүүлсэн байна. Энэ нь нийт өсөлтийн бараг тал гэсэн үг. Түүнчлэн экспортын үнийн дүн 2026 оны эхний есөн сард 16.2 тэрбум ам.долларт хүрлээ. Энэ нь өнгөрсөн оны мөн үеэс 51.3 хувиар өссөн үзүүлэлт юм. Өсөлтийн гол эх үүсвэр нь зэсийн баяжмал, нүүрс байв. Мөн хугацаанд импорт 14 хувиар нэмэгдэж, 9.72 тэрбум ам.доллар болжээ. Экспорт, импортын нийлбэр буюу гадаад худалдааны нийт эргэлт 25.92 тэрбум ам.долларт хүрсэн байна. Өмнөх оны мөн үеэс 34.7 хувиар өссөн гэсэн үг. Экспорт импортынхоос хурдтай өссөнөөр худалдааны эерэг тэнцэл нэмэгджээ. Гадаадад гаргасан барааны дүн гадаадаас авсан барааны дүнгээс 6.47 тэрбум ам.доллараар давсан байна. Өнгөрсөн оны мөн үед энэ зөрүү 2.17 тэрбум ам.доллар байсан бол өдгөө бараг гурав дахин их болжээ.
Экспортын хамгийн том хэсгийг зэсийн баяжмал бүрдүүлэв. Түүний экспорт 7.08 тэрбум ам.долларт хүрч, нийт дүнгийн 43.7 хувийг эзэлжээ. Чулуун болон хүрэн нүүрсний нийлбэр экспорт 6.11 тэрбум ам.доллар болж, 37.7 хувийг бүрдүүлсэн байна. Энэ хоёр бүтээгдэхүүн нийлээд Монголын экспортын 81.4 хувийг эзэлж байна.
Зэс, нүүрсний нөлөө экспортын өсөлтөөс бүр ч тод харагдана. Нийт экспортын дүн өмнөх оны мөн үеэс 5.49 тэрбум ам.доллараар нэмэгджээ. Энэ нэмэгдлийн 57.1 хувийг зэсийн баяжмал, 37.2 хувийг нүүрс бүрдүүлэв. Өөрөөр хэлбэл, экспортын нэмэгдсэн 100 ам.доллар тутмын 94 орчим нь энэ хоёр бүтээгдэхүүнд ногдож байна.
Бусад гол бараанаас боловсруулаагүй буюу хагас боловсруулсан алт нийт экспортын таван хувийг эзэлжээ. Төмрийн хүдэр, баяжмал 2.9 хувь, ямааны самнасан ноолуур 1.9 хувийг бүрдүүлсэн байна. Үлдсэн бүх бараанд 8.8 хувь ногдож байна.
Барааны нэр төрлөөс гадна борлуулах зах зээл ч өндөр төвлөрөлтэй байна. Нийт экспортын үнийн дүнгийн 93.1 хувь нь БНХАУ-д ногджээ. Швейцар 4.2 хувь, АНУ 0.8 хувийг эзэлсэн байна. Бусад бүх улсын нийлбэр ердөө 1.9 хувь юм. Ийм бүтэцтэй учраас Хятадын худалдан авалтын өөрчлөлт Монголын экспортод хүчтэй нөлөөлөх боломжтой.
Импортын хувьд ч хоёр хөрш гол байр суурьтай байна. Оруулж ирсэн барааны үнийн дүнгийн 41.2 хувь нь БНХАУ, 27.6 хувь нь ОХУ-ын гаралтай байв. Өөрөөр хэлбэл, импортын гуравны хоёроос илүү нь хоёр хөршид ногдож байна. Япон 8.8 хувь, БНСУ 3.8 хувь, АНУ 2.9 хувийг тус тус эзэлжээ. Импортын хамгийн том бүлэг нь эрдэс бүтээгдэхүүн бөгөөд нийт дүнгийн 25.9 хувийг бүрдүүлсэн байна. Энэ бүлэгт нефтийн бүтээгдэхүүн багтдаг. Машин, тоног төхөөрөмж, цахилгаан хэрэгсэл болон тэдгээрийн эд анги, сэлбэг 20.5 хувийг эзэлжээ. Тээврийн хэрэгсэл, эд анги 15.7 хувийг бүрдүүлэв. Эдгээр гурван бүлэгт импортын нийт үнийн дүнгийн 60 гаруй хувь ногдож байна.
Үүний дараа үндсэн төмөрлөг, түүгээр хийсэн эдлэл 9.3 хувь, хүнсний бэлэн бүтээгдэхүүн долоон хувь, химийн болон түүнтэй холбоотой үйлдвэрийн бүтээгдэхүүн 5.7 хувийг эзэлжээ. Импортод үйлдвэрлэл, тээвэрт ашигладаг бараа болон өдөр тутмын хэрэглээний бүтээгдэхүүн зэрэгцэн томоохон байр суурь эзэлж байна.